لأول مره اخرجكم برا جو المدونه ..بس محتاجه مساعدتكم !
اكتشفت عن طريق الصدفه
ان فى حاجات ببتسرق من عندى هنا !!
منها "ذات غفوة سأندس بك "
وكمان "الليلة اريد ان ارقص التانجو معك "
وطبعا لما شفتها مشرفه عند الناس التانيه
اتنرفزت جدا جدا ...
ممكن اعرف بتتصرفوا ازاى فى المواقف دى ؟؟
حقيقى محتاجه اعرف رأيكم فى موضوع
السرقه الأدبيه عينى عينك
لممتلكات الأخرين الفكريه .
يعنى مش متخيله ناس تعمل كده ..
ممكن قوى الواحد من فكره قراها عند حد
يكتب نص خاص بيه وبروحه واسلوبه
لكن سرقه !!
عينى عينك !!
مش عارفه اتصرف ؟؟!!
هناك 14 تعليقًا:
بيما انك مش عامله حقوق نشر للكلام الي بتكتبيه يبقي سيبك من المحاكم
بس في طريقه حلوه في الموضوع ده انك تشردي وتفضحي الي سرق منك الكلام وفي الحاله دي يمكن ينكسف علي دمه ويبطل يسرق
تقبلي مروري
مجنووون
مجنون اخويا ..
منجلكش فى حاجه وحشه ابدا ...
والله الموقف نرفزنى فوق ما تتخيل ... يعنى مفيش امانه ولا ضمير ..
مش عارفه اقول ايه ..بس سعيده جدا جدا بانك جيت .
ومش بضحك المرادى يا عم لما اشوف اسمك .
ميرسي على تعليقك فى البوست اللى قبله . بتسعدنى ديما زيارتك .
لولا
اذا ماكنتش لولا هى اللى تتسرق
مال مين
يااااااا جميل
اعتبريه صدقة للانسانية
وكمان دى بيعطيكى ثقة
فى انك اقتحمت عالم طمع فيه غيرك
ابتسمى وروقى
ابو على ...
لأ بجد اتعصبت جدا ... والله العظيم عمرى ما اتنرفزت كده ... كنت حتجنن لما شفت الكلام مكتوب عندهم ..
طبعا اول مره يحصل معايا كده ..
وتتحرق اكتر لما تعرف انك مش فى ايدك حاجه !!!
ميرسي على زيارتك دى .. اهو الاقى حد اتكلم معاه يحس بالموقف .
لولا
لولا ..
الموضوع ده بيحصل كتير
في مجلة من المجلات الأدبية كنت أكتب مقالات وخواطر بإسمي الحقيقه .
تخيلي أنني غبت كام شهر لظروف معينة ، رجعت لقيت واحد مسجل بنفس إسمي وبيكلم أصدقائي على إنه أنا لمده 4 شهور
وعندما تناقشنا
قال لكل منا تجربته الأدبية والعيب في القارئ الذي لم يميز ، ورفض تغيير الإسم
عموما هو لابد ما ينكشف فلا تقلقي
انتي عندك حق
حاجه تنرفز اوي
لما الواحد يكتب حاجه من جواه وكل احاسيسه واسلوبه فيها وتبقي حاجه جميله زي الاجات اللي بتكتبيها ويجي حد ياخده منه .. فعلا صعبه
انا لما اتخيلت ان الموقف دا يحصل معايا فعلا حسيت انني ممكن اكل البني آدم اللي يفكر يعمل كدا
بس عارفه
انا مع رأي مجنون تماما
فعلا شيء ينرفز
ممكن تنشري عناوين اللي سرق منك والناس تروح تعلق عندهم وتقول عيب كده
تحياتي
يالله حتى احساس بيخرج من جوانا
ليه كدا وليه اى مخلوق يدى لنفسه حق
انه يستولى على احاسيس ومشاعر
انسان آخر مش كفاية بتتسرق فرحة
قلوبنا من اعز الناس لينا كمان
احاسيسنا تتسرق عينى عينك
اللى عمل كدا لازم يتعرف ويلام على
ذلك حرام بجد
طب فاضل ايه
smilyrose
وردشان
روح الحب الصادق
ابعتي للجهة و قولي انه شغلك
ساهر ..
شاكرك جدا اهتمامك وتتبعك للرابط والمنتدى الملحد اياه .. حقا عاجزه عن الشكر اخى ساهر .
وطبعا استوعبت ان الموضوع مشاع ويحدث وسيتكرر حتى .. ولكن صدقنى مع كل تكرار ستكون هناك غصه دوما من العجز عن الدفاع عن حقك .. اظنك تفهمنى .
بالغ الشكر وعلى فكره قرأت تعليقاتك على البوستات السابقه وصدفة سعيده تلك التى جعلتك هنا .
لولا
هاجر ..
زيارتك جميله ورائعه ومشاركتك الوجدانيه اروع .. وسأفعل كما قال مجنون فعلا .
ميرسي جدا ليكى
لولا
فكره من الزمن ده
فكرت فى كده فى البدايه ..حاليا هديت اكتر ومستوعبه ان الموضوع ممكن يتكرروعشان كده بفكر فى حل عملى.
لكن فعلا حاجه تغيظ وتحرق الدم .
ميرسي جدا ليكى
لولا
smilyrose
شفت الدنيا شكلها ايه .. هو دا الواقع للأسف !!
بشكرك جدا على انك هنا وعلى مشاركتك الوجدانيه دى .. وجودكم هنا اسعدنى لأقصى درجه
لولا
شيماء ..
بجد لما لقيتك هنا حسيت انك صديقه بجد وجيتى وقت ما انا محتاجاكى ..
المشكله ان فى نص اتسرق من واحد سافل وقليل الأدب وواضح انه حيكون قليل الأدب فى الرد والتانى من منتدى ملحد ورغم كده فى صديق ليا دخل هنا وفتح موضع وضح فيه الموقف .
لولا
إرسال تعليق